Sygnir startar bygging av ny transformatorstasjon på Kvåle
Jimmy Stølen, prosjektleiar i Sygnir. I bakgrunnen er Kvåle transformatorstasjon som skal erstattast.
Elektrifiseringa av samfunnet fører til høgare straumforbruk og større belastning på nettet. Den eksisterande transformatorstasjonen på Kvåle i Sogndal nærmar seg kapasitetsgrensa, og den tekniske tilstanden tilseier at anlegget må bytast ut. Bygginga av ny stasjon startar i slutten av oktober. Vegen frem til byggestart har vore lang, og både NVE og Energidepartementet har handsama saka i fleire ulike rundar.
– Me har hatt fokus på både tekniske krav og omsyn til visuelle og naturlege omgjevnader i prosjektet. Den nye stasjonen på Kvåle vil bidra til at straumnettet i Sogndalsområdet er betre rusta for framtidas behov, seier prosjektleiar i Sygnir, Jimmy Stølen.
Omsyn til omgjevnadene
Den nye transformatorstasjonen blir bygd på nedsida av Fjærlandsvegen, like ved dagens anlegg. Plasseringa er vald etter omfattande vurderingar av kostnad, miljø og tekniske krav. I samarbeid med Norconsult har stasjonen fått ei utforming som glir naturleg inn i terrenget, og plasseringa tek omsyn til ønskje om framtidig friområde og mogleg elvesti langs Sogndalselva.
Eit anna aspekt som har blitt nøye vurdert er bruken av matjorda på tomta. Sidan den nye transformatorstasjonen blir bygd på dyrka mark, har myndigheitene sett som vilkår at matjorda skal omdisponerast og takast vare på. Det skal derfor dyrkast opp eit minst tilsvarande areal ein annan stad.
– Me har òg lagt stor vekt på at anlegget skal passa inn i området. Fasongen, materialvala og fargane er nøye valde for å redusera visuell påverknad, og me har redusert storleiken på anlegget så langt det let seg gjera, held Stølen fram.
Fleire lokale firma deltek i byggjeprosjektet, der Sogn Entreprenør AS frå Gaupne er hovudentreprenør.
– Me er glade for å ha med lokale entreprenørar, då dette bidreg til verdiskaping i regionen. No ser me fram til byggjestart, og tek – med atterhald – sikte på spenningssetting sommaren 2027, avsluttar Stølen.
